LE LIEUVR E LA TEURTUE

Adapté d'une fable de Jean de la Fontaine.

Ren se sert de coure,

Faot parti a l'oure :

Le lieuvr e la teurtue

Nen sont une exempl benvenue.

—Tu vais l'endret la-lein,

Qe dit la teurtue, parie qe j'i arive avant tai.

—Més t'és béte a manjer du fein !

Tu vâs pâs aossi vitement come mai,

Qe li repont le lieuvr,

Faot te souegner, t'âs ventiés de la fieuvr.

—Béte ou pâs, je parie tout come

Pour une paire ou pour une pome.

—Come tu voûrâs,

Tout de sieute, j'i vâs,

Je te fès ça en deûz encalées.

Més avant, je vâs fére une muzée.

I pensaet avair ben le temp come d'amouéz

De pâturer, de chopetter e de lever le néz.

La teurtue, lë, alaet petit petaod,

Durant qe le lieuvr, li, fezaet le fieraod.

A la fin, cant i vit qe l'aotr aboutaet bentôt

Il alit come le diabl e son train

Més ça ne li servit de ren :

La teurtue arivit la permiere ao bout du cllôz

—Ben dis don !

Q'o li huchit, qhi q'avaet rézon ?

De cai qe ça sert de coure si vitement

Si c'ét pour perdr son temp ?